Bahar ai to jaise ek bar
laut aye hain phir adam se
vo khvab sare, shabab sare
jo tere honthon pe mar mite the
jo mit k har bar phir jiye the
nikhar gaye hain gulab sare
jo teri yadon se mushkbu hain
jo tere ushshaq ka lahu hain
ubal pare hain azab sare
malal-e-ahaal-e-dostan bhi
khumar-e-agosh-e-mahavashan bhi
gubar-e-khatir k bab sare
tere hamare
saval sare, javab sare
bahar ai to khul gaye hain
naye sire se hisab sare
bol k lab azad hain tere
bol zaban ab tak teri hai
Tera sutawan jism hai tera
bol k jan ab tak teri hai
dekh k ahangar k dukan main
tund hain shole surkh hai ahan
khulne lage quflon k dhane
phaila har ek zanjir ka daman
bol ye thora waqt bahot hai
jism-o-zaban k maut se pahle
bol k sach zinda hai ab tak
bol jo kuch kahna hai kah le
buhat mila na mila zindagi se gam kya hai
mata-e-dard baham hai to besh-o-kam kya hai
ham ek umr se waqif hain ab na samjhao
k lutf kya hai mere meharban sitam kya hai
kare na jag main alaw to sher kis maqsad
kare na shahar main jal-thal to chashm-e-nam kya hai
ajal k hath koi a raha hai parwana
na jane aj k fehrist main raqam kya hai
sajao bazm gazal gao jam taza karo
buhat sahi gam-e-geti sharab kam kya hai
lihaz main koi kuch dur sath chalta hai
wagarna dahar main ab khizr ka bharam kya hai
